Psa 40 | KYG | STEP | Nagaemo Ala kava ne'mo'a naha maesiyafe'mo keya ae'na ge hute'nae'mo naipamo'mo falu hu'nige'na agava mai'nogeno'ae'mo ape huno agetafo hu'neno ge'nimo afi'niye.

Psalms 40

Ge hu'nigeno Ala kava ne'mo'a afi'niya'mofe'mo yokemo hu'niya gemae

1 Nagaemo Ala kava ne'mo'a naha maesiyafe'mo keya ae'na ge hute'nae'mo naipamo'mo falu hu'nige'na agava mai'nogeno'ae'mo ape huno agetafo hu'neno ge'nimo afi'niye. 2 Agaemo alagi hosu ive kelifati'mo nayate alino heno navayu huno navalelino haino yafate'mo nateteno alagepa kate'mo visuvafe'mo alino lokiya vaino nate'niye. 3 Saufa yokemo alino naya male'nige'na Goti agi'ale'mo ali'na asaga hute'na ani yokemo nehuve. Asole vaya'mogimo nagete'apae'mo koli hute'a Ala kava nefe'mo apakesamo afi'a fatago hute'apae'mo, laha maegaiye, hu'a hute'a maigae.

4 Ala kava nefeke'mo apakesamo afi'a fatago hute'apae'mo, laha maegaiye, hu'a nehaya vaya'mogimo Goti aulagale'mo alagepa hu'a mai'nayanage'a afa'a apamogagamo aigae. Apakaemo himu'namu kava'mo nehaya vaya'mofi aigofe goti'apimogife'mo mono nehaya vaya'mofi huno ala apaki'apimo no'apamiye. 5 O Ala kava ne'nimo Goti'nimogae, hu'na, lagaetegamo alu kava alu kava'mo huka ali'ya'mo aliteka laha mae'nane. Lagaefe'mo kagesa afifi huka ne'maine. Lagaemo lekana opaisuna agufa kava'mo huka lagaefe'mo kagesamo ne'afine. Nagaemo muki hu'nana kavaka'e kagesamo ne'afina kavakalefe'mo alagi alagepa hu'na ae'na hakalo hu'na hapa opaiguve.

6 Afumo amagi'a nekamiya kava'e ofalinimo nekamiya kava'efe'mo okahau'niye. Kagaemo, hosu kavatapilefe'mo afumo amagitapa hi'yalamute'mo atafi'mo kaetapa namiyo, huka osu'nana'monanafa gekamo afisuva agufa nagesage'mo nami'nane. 7 Nami'nanage'nae'mo, Nago, hu'na, nagaemo ne'ove. Goti mukufi'mo nava gemo hane'niye. 8 O Goti'nimogae, hu'na, ke'aepa gekamo naipafi'mo hane'niye. Kagaemo huvo, huka naha pai'nana gekamo akame hisuvafe'mo amuse hute'na namogaga ne'auve. 9 Nagaemo asole vaya'mo e'a ali'a anupa hu'a mai'naya yate'mo fatago kavakae'mo alagepa faigoko gekamo ae'na hakalo hu'na hapa pai'nove. Ago nage'nanana afa'a o'mai'na gekamo ae'na hakalo hu'na hapa nepauve. 10 Nagaemo fatago kavakamo naipafi'mo ae'na ati kae'na o'male'nofa nagaemo, ge'amo alagi amagino o'ataleno akame nehuno'ae'mo apakufamo alino katino ne'apate, hu'na ae'na hakalo hu'na hapa pai'nove. Nagaemo asole vaya'mo e'a ali'a anupa hu'a mai'naya vaya'aife'mo kahau kayamopafi'mo nekahaiya kavaka'e lama ge geka'e'mo ae'na ati okae'na ae'na hakalo hu'na hapa pai'nove.

11 Ala kava nene, hu'na, o'nataleka kahau huka nato. Nagaefe'mo kahau kayamopafi'mo kahau'ninageka lama gekamo akame huge'nao muki afina'mo afa'a maino. 12 Lekana opaisuna agufa hanageke ya'mo'mo nagufale'mo faino ku aino nate'niye. Hosu kava'nimo'a natafau'niyanage'na afa'a ali'na maku hu'na okagegauve. Nayoka'mo asole ya'mo hane'niya kava huno hosu kava'nimo mago'e huno hane'niya'mofe'mo naipamo'mo lokiya o'vai'nigeno lokiya'nimo alagi ohane'niye. 13 Ala kava nene, hu'na, kahau'nisigeka nagufamo alika katika nato. Ala kava nene, hu'na, malage huka naha mao. 14 Kagaemo naha maege'apao kamiti namagigefe nehaya vaya'mo apavagage hisige'a negi nagi hiyo. Hosu ya'mo ali'a namigefe nehaya vaya'mo apakamelagati'mo asagau'a ai'a heleve hisageno apaki'apimo asagauno aino. 15 Kigi hu'a natete'a nagaefe'mo, vaehae, vaehae, hu'a nehaya vaya'mo apavagage hisiya ya'mo alika apamige'a hapau aiyo.

16 Hapau aigaya'monanafa kagaefe'mo kahauya huli'a ne'aya vaya'mogimo apamogaga aite'a kagaefe'mo amuse hiyo. Apakufamo alika katika ne'apatana kavafe'mo hapau'nisiya vaya'mogimo, Ala kava ne'mo ala agi'amo amiyo, hu'a hiyo. 17 Inagi nagaemo afa vekamo mai'ne'na kafu hu'na mai'nova'monanafa Ala kava ne'mo'a nagaefe'mo agesamo ne'afiye. O Gotiyo, hu'na, naha maeka nagufamo alika katika ne'natana veka'nimogae, afa'a o'maika malage huka naha mao.